《东张西望》杂志：用音符见证际遇——信大声嗌

上一篇 / 下一篇 2008-05-29 08:31:24 / 个人分类：新闻+图片

查看( 9 ) / 评论( 57 )

从一个籍籍无名嘅酒吧驻唱到当红组合嘅灵魂人物，再摇身以千万身价单飞发展，一路走嚟，有几多故事有几多辛酸相信只有当事人先会深刻体会得到。信作为信乐团嘅主唱，旧年突然宣布单飞，得到嘅唔係祝福而係「背叛」二字，团队五年几感情一铺清袋。以千万身价签咗艾迴，表面上睇不知有几风光，但其实得到唔係必然嘅，因为得到之前，付出嘅或者係更多。「背叛」嘅背后究竟又有几多不为人知嘅秘密呢？信又係咪真係可以如此潇洒，如此无情？有时睇到嘅嘢未必係事实，而事实亦唔係咁容易俾你睇到。从驻唱到单飞再到依家，其实喺不知不觉间，音符已经见证住信嘅际遇，每个时期都有那么一首信的独白。

酒吧蜗牛（《没有你的夜》）

早前，信嚟到广州出席MTV主办嘅不插电演唱会，上演咗一场飙歌盛宴，听到歌迷个个high晒。为咗呢此演出，信精心挑选咗11首曲目，而排喺第一嘅係呢首《没有你的夜》。排在最前，当然有佢独特嘅原因，数下手指，原来呢首歌已经有12岁，皆因佢喺96年已经录制好，只不过一直无人识得欣赏，直到02年先被伯乐相中，正式面世。
讲起呢首歌，信直言「其实这首歌很能体会我那几年的一些辛酸和经历，它陪我度过最艰难的日子，所以对我来说特别具有意义。」想当年，信仲喺酒吧驻唱，又因为成日飙高音而被人炒鱿鱼。而当时唱一场嘅报酬只够维持两日生计，场数几只手指数得晒。喺如此落魄嘅日子，信得到屋企人无限嘅支持，保住蜗牛精神，一步一步往上爬，而呢种坚持亦成就咗今日嘅信。

向左走向右走（《天知道》）

旧年三月，信正式宣布单飞，以千万身价加入艾迴，同时揹起「背叛」二字。信乐团嘅其他成员极度不满点解佢哋会喺最后一个知道信单飞嘅人，而且抱怨信谂法多，并唔专心于音乐，从此各行各路。信单飞之后信乐团要靠卖乐器维生等种种遭遇令到外人更加觉得信嘅无情，信嘅自私。但好多嘢，唔係当事人，就唔会知道个中错综复杂嘅问题。被问到单飞之后嘅感觉，信好直接咁讲「《天知道》就是我当时的感觉。」《天知道》里面嘅「就算全世界都没人懂，人生最苦的是放开手。」知道放手係最苦，但仍然选择痛苦，背后嘅苦衷唔係你我可以体会，但既然自己选择咗，就要积极面对，正如《天知道》里面唱嘅「相信自己，没有逃避，问心无愧，负担过去。」

做番自己（《我就是我》）

讲好要负担过去，当然唔可以斋讲唔做喇。其实信一直有一个心愿，就係有唱唔完嘅演唱会，虽然呢个心愿听上去似乎有些少贪心，但其实呢种何尝唔係对音乐嘅一种执着呢？要证明自己，每个人都有唔同嘅表现方式，「站在台上才可以感觉到自己的存在。」呢种就係信证明自己嘅方式。为咗令自己可以变得更好，信自爆最名单上网睇fans留言，吸取好多意见，咁重视呢班米饭班主，难怪啲fans咁撑你喇。
另外，信仲自爆希望以后可以喺海边开一间民宿，是因佢非常enjoy对住个海嘅感觉。喺台北嘅时候，佢时不时被会放下假去垦丁玩番几日，「一早起来可以看到大海，感觉很舒服，我喜欢对着大海发呆。」呢种休闲生活相信大把艺人都十分向往，所以信话希望可以开一间民宿提供俾大家住，同大家分享呢仲快乐同自在。可以做番自己，确实係一种难得。

后记：《没有你的夜》、《天知道》、《我就是我》，就係咁样，信用音符谱写自己嘅人生，记录各种际遇，然后继续大步向前走。近日，信四围频扑，积极为5月17号嘅上海个唱而做好准备，一于用佢擅长嘅高音大声嗌，嗌出自己，嗌出喜怒哀乐，嗌出信式音乐。

PS：同上